உலகக் காப்பியங்கள்

உலகக் காப்பியங்கள், இரா. காசிராசன், நியூ செஞ்சுரி புக் ஹவுஸ் (பி) லிட், பக். 484, விலை 360ரூ.

கற்பனை வளம், சிந்தனைத் திறன், சுவை உணர்வு, இலக்கிய நயம் ஆகியவை மிக்க ஓர் உன்னதப் படைப்புதான் காப்பியம். மனித சமுதாயமும், மனித வாழ்க்கையுமே இதன் அடிப்படை. உலக மொழிகளில் இலக்கியப் படைப்பு எவ்வாறு வளம் பெற்றுப் பொலிந்துள்ளது என்பதை எடுத்துக்காட்டும் நோக்கில் இந்நூல் அமைந்துள்ளது. தமிழ்க் காப்பிய ஆய்வாளர்களுக்கு ஒப்பீட்டு முறையில், உலகக் காப்பியங்களைத் தொகுத்து அளிக்கும் முயற்சியாக இந்நூல் உள்ளது. காப்பியத்தின் தன்மை, தோற்றம், வளர்ச்சி ஆகியவை பற்றிய கட்டுரைகள் இடம்பெற்றுள்ளன. இந்நூலில் சில உலகச் சிறப்புமிக்க காப்பியங்களின் கதைப் பகுதியும் விரிவாக எடுத்துக் கூறப்பட்டுள்ளது. காப்பியக் காலச் சிந்தனைப்போக்கு, உலகக் காப்பியங்கள் அனைத்துக்கும் பொது என்பதை வாசகர்களுக்கு இந்நூல் ஏற்படுத்தும். தமிழ்க் காப்பியங்களோடு ஒப்பிட்டு நோக்கத் தக்க பல விஷயங்கள் பிற மொழிக் காப்பியங்களில் நிறைந்துள்ளதை இந்நூலின் மூலம் அறியலாம். தமிழ் அறிஞர்களுக்கும் ஆய்வாளர்களுக்கும், மாணவர்களுக்கும் பயனுள்ள படைப்பு. நன்றி: தினமணி, 27/4/2015.