சிகரங்கள் தொடுவதற்கே

சிகரங்கள் தொடுவதற்கே, பா. மூவேந்திரபாண்டியன், இலக்கிய மதி, 563, கே.கே. நகர், மதுரை 20, விலை 100ரூ.

கவிஞர் ப. மூவேந்திரபாண்டியனின் கவிதைப்படைப்பு, சிட்டுக்குருவியின் சிணுங்கலை இசைக்கச்சேரிக்கு ஒப்பிட்ட விதத்தில் கவிஞரின் கவிமனம் கலைமணம் வீசுகிறது. முரண்பாடு என்ற கவிதையில் தேனாய் தித்தித்தது புது மனைவி செய்த பாகற்காய் கூட்டு, வேப்பங்காயாய் கசந்தது ஒரு வருடத்துக்குப் பின் அவளே செய்த சர்க்கரைப் பொங்கல் என்ற கவிதை வரிகள் இடறிப்போன தாம்பத்ய நேசத்தின் அவலத்தை மனதில் இடியென இறக்கியது நிஜம். தமிழன்னையின் வேதனை வெளிப்பாடாக ஒய் திஸ் கொலைவெறி பாட்டுக்கு வைத்திருக்கும் குட்டு, இனியவாது தமிழ் ஆர்வலர்கள் இணைந்து தமிழைக் காப்பாற்ற முன்வரலாமே என்ற ஏக்கத்தின் வெளிப்பாடு. நன்றி: தினத்தந்தி, 26/3/2014.  

—-

சேது காப்பியம், கவியரசன் பதிப்பகம், 31(12) சாயிநகர் இணைப்பு, சின்மயா நகர், சென்னை 92, விலை 500ரூ.

பெருங்கவிக்கோ வா.மு. சேதுராமன் எழுதிவரும் சேது காப்பியம் நூலின் 5ம் பாகம் இனிய காண் காண்டம் என்ற பெயரில் வெளிவந்துள்ளது. தற்காலக் கவிஞர்கள் பெரும்பாலும் புதுக்கவிதைகளே எழுதி வருகின்றனர். இந்நிலையில் சேது காப்பியத்தை அழகும், ஆழமும் மிக்க மரபுக் கவிதைகளாக எழுதியிருப்பது பாராட்டத்தக்கது. இதில், பெருங்கவிக்கோ தனது வாழ்க்கை வரலாற்றை மட்டும் இன்றி, தமிழ் பற்றி தமிழ்நாட்டைப் பற்றி, தமிழ் அறிஞர்கள் பற்றி எல்லாம் அரிய கருத்துக்களையும், தகவல்களையும் கூறுகிறார். சேது காப்பியம் நிறைவடையும்போது சிறந்த இலக்கியமாகத் திகழும் என்பதில் ஐயமில்லை. நன்றி: தினத்தந்தி, 26/3/2014.