திருவெம்பாவை திருப்பாவை உரையும் ஓவியங்களும்

திருவெம்பாவை திருப்பாவை உரையும் ஓவியங்களும், குமாரதேவர் பதிப்பகம், கோயம்புத்தூர், பக். 120, விலை 200ரூ.

சங்க இலக்கியத்தில், கன்னிப் பெண்கள் நீர்த்துறையில் நீராடி, நமக்கு நல்ல கணவன் வாய்க்க வேண்டி இறைவனைக் குறித்து நோன்பு நோற்று வழிபாடு நடத்தியதை தை நீராடல், மார்கழி நீராடல், பாவை நோன்பு என்றெல்லாம் கூறப்பட்டுள்ளன. இதை பரிபாடல் கலித்தொகை, ஐங்குறுநூறு முதலிய சங்க நூல்கள் சிறப்பித்துக் கூறுகின்றன. சங்ககாலம் தொட்டு இன்றுவரை இப்பாவை நோன்பு பலராலும் கடைப்பிடிக்கப்பட்டு வருகிறது. மாணிக்கவாசகரும் ஆண்டாள் நாச்சியாரும் அருளிச்செய்த திருவெம்பாவை, திருப்பாவை ஆகிய இரண்டும் மார்கழி மாதத்தில் கோயில்களிலும் இல்லங்களிலும் படிக்கப்பட்டு வருகின்றன.அதுமட்டுமல்ல, தாய்லாந்து நாட்டில் பதவியேற்பின்போது பாவைப் பாடல்கள் இன்றளவும் பாடப்பட்டு வருகின்றனவாம். இவ்விரு பக்திப் பனுவல்களுக்கும் இதுவரை எத்தனையோ விளக்கவுரைகள் வெளிவந்திருந்தாலும், இந்நூலாசிரியர் ஓர் உரையாசிரியராக மட்டுமல்லாமல், அப்பாடல்களுக்குரிய தக்க ஓவியங்களைத் தம் கைப்பட வரைந்து பாடல்களுக்கு உயிரூட்டுய ஓவிய ஆசிரியராகவும் திகழ்கிறார். ஓவியர் கோபுலுவை மானசீகக் குருவாகக் கொண்ட இவர், அவர் இட்ட அன்புக் கட்டளைக்கு இணங்க வண்ண ஓவியங்களை வரைந்து இணைத்துள்ளதும், வழவழப்பான வண்ணத் தாள்களில் நூல் கட்டமைக்கப்பட்டுள்ளதும், ஒவ்வொரு பாடலுக்கும் எளிமையாக விளக்கவுரை எழுதியிருப்பதும், பொருள், உட்பொருள், குறிப்புப்பொருள் ஆகியவற்றைத் தந்திருப்பதும்தான் இந்நூலுக்குச் சிறப்பு சேர்க்கின்றன. நன்றி: தினமணி, 30/3/2015.