தமிழ்வாணனின் தன்னம்பிக்கைக் கட்டுரைகள்

தமிழ்வாணனின் தன்னம்பிக்கைக் கட்டுரைகள், தமிழ்வாணன், மணிமேகலைப் பிரசுரம், பக். 424, விலை 250ரூ.

கல்கண்டு பத்திரிகையின் நிறுவனரான இந்நூலாசிரியர், 1960-80களில் அரசியல், ஆன்மிகம், சமூகம், மருத்துவம், பொருளாதாரம், வரலாறு என்று பல்வேறு துறைகள் குறித்தும் விவரித்து எழுதும் ஆற்றல் மிக்கவர். தவிர, இவர் எழுதிய ‘சங்கர்லால் துப்பறியும் மர்மநாவல்கள்’ பெரியோர் முதல் சிறுவர்கள் வரை அனைவரையும் ஈர்த்தவை. அந்த வகையில், அன்றைய தலைமுறையினருக்கு மறைந்த இந்நூலாசிரியர் எழுதிய தன்னம்பிக்கைக் கட்டுரைகள் படி, இன்றைய தலைமுறையினருக்கும் பயன்தரக்கூடியவையே. இதில் 60க்கும் மேற்பட்ட கட்டுரைகள் அவரது மகன் லேனா தமிழ்வாணனால் தொகுக்கப்பட்டுள்ளன. ‘மனம் அமைதி பெற மனிதன் என்ன செய்ய வேண்டும்?’ என்ற கட்டுரையில், அனைத்துத் துன்பங்களுக்கும் ஆசையே முழுக்காரணம் என்று கூறும் ஆசிரியர், ஆசைகள் இல்லாமலும் வாழ முடியாது என்கிறார். அப்படியானால் எப்படி மனம் அமைதி பெறலாம் என்பதையும் இக்கட்டுரையில் விவரிக்கிறார். ‘அறிவு வளர வேண்டுமா?’ என்ற கட்டுரையில், இதற்காக என்ன விதமான பயிற்களைச் செய்ய வேண்டும் என்பதை கூறுகிறார். ‘நம்மைப் பற்றி நாமே அறிந்து கொள்ளச் சில கேள்விகள்’ என்ற கட்டுரையில், நம்மைப் பற்றி 20 கேள்விகள் கேட்டு, அதற்கு ‘ஆமாம், இல்லை’ என்ற பதிலை மட்டும் கொடுக்க வைத்து, முடிவில் அவற்றுக்கு உண்டான விடைகளைக் கொண்டு நம்மைப் புரிந்துகொள்ள வைக்கிறார். இப்படிப் பல கட்டுரைகள் பல்வேறு விஷயங்களை விளக்குவது சிறப்பாக உள்ளது. -பரக்கத். நன்றி: துக்ளக், 16/3/2016.