ஸ்ரீமத் பாகவதம்

ஸ்ரீமத் பாகவதம்,  டி.வி.ராதாகிருஷ்ணன், குவிகம் பதிப்பகம்,  பக்.214,  விலை ரூ.180.

ஹைந்தவ பக்தி இலக்கியத்தில் மகாபுராணமான ஸ்ரீமத் பாகவதம் சிறப்பான இடத்தை வகிக்கிறது. பகவத்கீதைக்கு அடுத்தபடியாக அதிக உரைகள் இயற்றப்பட்டதும் பாகவதத்துக்குத்தான். சைதன்யர், வல்லபாசார்யரின் பக்தி மார்க்கத்தின் முக்கிய தூண்களில் ஸ்ரீமத் பாகவதமும் ஒன்றாகும். புராண இலக்கியத்தின் கீழ் அமைந்துள்ள இந்த நூல், பக்தி சம்பிரதாய பரவலுக்குப் பெரிதும் அடிப்படையாக அமைந்தது. இதனை இயற்றியவர் வியாசர் என்பது மரபு.

நமது புராண இலக்கியங்களின் வடிவத்தையொட்டியே, கதை, கதைக்குள் கதை, கிளைக் கதை என விரிந்து பல்லாயிரம் சுலோகங்களைக் கொண்டதாக பாகவதமும் அமைந்துள்ளது. அதனை 34 அத்தியாயங்களில் சுருக்கித் தருகிறது இந்த நூல்.

மகாவிஷ்ணுவின் அவதாரங்கள், யயாதியின் சரித்திரம் போன்ற கதைகள் சுருக்கமாக தரப்பட்டுள்ளன. கிருஷ்ணாவதார பகுதி தொடங்கியதும் ஒன்றன்பின் ஒன்றாக கிருஷ்ணரின் அவதார நோக்க லீலைகள் சுவாரசியமாக விவரிக்கப்படுகின்றன.

பாகவத மூல நூல் போக்கிலேயே, பாரதக் கதை முடிவிலிருந்து யுதிஷ்டிரனுக்குப் பின் குரு வம்ச அரியணையேறிய அபிமன்யுவின் மகனான பரீட்சித்துக்கு உபதேசிக்கப்படுவதாக அமைந்துள்ளது. பாரம்பரிய பாகவதத்தின் ஏறத்தாழ எல்லா முக்கிய பாகங்களையும் அடக்கியிருக்கிறது இந்நூல். சுவாரசியம் குன்றாமல் தொடர்ச்சியாக வாசிக்கும்படி எழுதப்பட்டுள்ளது. பாகவதத்துக்கான அறிமுக நூலாக இதைக் கொள்ளலாம்.

நன்றி: தினமணி, 3/1/22.

இந்தப் புத்தகத்தை வாட்ஸப்பில் ஆர்டர் செய்ய: 9500045609

இந்தப் புத்தகத்தை போன் மூலம் வாங்க: டயல் ஃபார் புக்ஸ் – 04449595818