தக்கர் கொள்ளையர்கள்

தக்கர் கொள்ளையர்கள், இரா. வரதராசன், கிழக்கு பதிப்பகம், பக்.224, விலை 200ரூ.

வரலாற்றில் முதுகலைப் பட்டம் பெற்ற இந்நூலாசிரியர், இத்துறை தொடர்பான மிகப் பழைமையான ஆவணங்களைத் தேடி நாடு முழுவதும் பயணம் செய்து, பலவகையான அரிய தகவல்களைத் திரட்டியுள்ளார். அந்த வகையில் தக்கர் கொள்ளையர்களைப் பற்றிய தனியான தொகுப்பே இந்நூல்.

பாரசீகத்தில் முஸ்லிம் மதத்திலிருந்து விலக்கி வைக்கப்பட்டு இந்தியா வந்த நாடோடி பழங்குடியினரும், இங்குள்ள ஹிந்து பழங்குடியினரும் இணைந்து உருவாக்கியதே இந்த தக்கர் குற்றச் செயல்பாடுகள். இவர்கள் சுமார் 8000 ஆண்டுகளாக இந்தியாவின் வட பகுதிகளில் ஆயிரக் கணக்கில் பரவி, கொலை, கொள்ளைகளில் ஈடுபட்டார்கள். இவர்களால் சூட்சுமமாக கொலை செய்யப்பட்டவர்கள் எண்ணற்றோர்.

இவர்கள் வணங்கிய தெய்வம் மாகாளி. இந்தக் கொள்ளையர்களைப் பிடித்து தண்டித்தால், இந்தக் காளியால் தங்கள் உயிருக்கும் ஆட்சிக்கும் கேடு விளையுமோ என்று அன்றைய மன்னர்களும் அஞ்சியுள்ளனர். அந்நிலையில், வில்லியம் ஸ்லீமன் என்ற துணிச்சல் மிக்க பிரிட்டிஷ் அதிகாரியின் தலைமையில் நடந்த, சுமார் 40 வருட பெரும் போராட்டத்தில் தக்கர் கொள்ளையர்கள் முற்றிலுமாக அழிந்தனர்.

இந்நூலில் தக்கர்கள் யார் என்று தொடங்கி, அவர்கள் நடத்திய வேட்டைகளும், படிப்பவர்களுக்கு ஒரு மர்ம நாவலைப் படிப்பது போன்ற விறுவிறுப்பை ஏற்படுத்தும். தவிர, இந்தியாவின் கடந்த கால சம்பவங்களை தெரிந்து கொள்ளவும் இந்நூல் பெரிதும் பயன்படும். இந்நூலுக்கு புகழ் பெற்ற ஐ.பி.எஸ். அதிகாரியான வால்டர் தேவாரம் அணிந்துரை அளித்திருப்பது தனிச்சிறப்பு.

-பரக்கத்.

நன்றி: துக்ளக், 16/8/2017.