வீழ்வதற்கல்ல வாழ்க்கை

வீழ்வதற்கல்ல வாழ்க்கை, லேனா தமிழ்வாணன், மணிமேகலைப் பிரசுரம், பக். 168, விலை 100ரூ.

Master of all subjects – என்று பாராட்டப் பெற்ற எழுத்தாளர் தமிழ்வாணனின் வாரிசுதான் இந்நூலாசிரியர். இவரும் தன் தந்தையைப்போல தனக்கென ஒரு வாசகர் வட்டத்தை தக்க வைத்துக் கொண்டுள்ள எழுத்தாளர்.

இதுவரை 85 நூல்களை எழுதியுள்ளார். இவரது படைப்புகளை ஆராய்ந்து, எம்.ஃ.பில்., பி.எச்.டி. பட்டங்களைப் பெற்றவர்களும் உண்டு. அண்டார்டிகாவைத் தவிர, அனைத்து உலக நாடுகளையும் சுற்றி வந்தரும்கூட. தினமலர் வார மலரின் முன்னேற்றமான வாழ்க்கைக்கு உரிய விஷயங்களைக் குறித்து, இவர் எழுதிய சிறப்பான கட்டுரைகளின் தொகுப்பே இந்நூல்.

காதலர்களாக ஒரு ஆணும், பெண்ணும் சண்டையில்லாமல் பலகாலம் பழகலாம். ஆனால், அவர்களே கணவன்-மனைவியாக ஆன பிறகு, சண்டையில்லாத நாளை பார்ப்பது அபூர்வம். இதுதான் உலக யதார்த்தம். ஆனாலும், சண்டையில்லாமல் வாழும் கலையைப் பற்றி முதல் கட்டுரையில் எளிய முறையில் விளக்கியுள்ளார்.

அடுத்து, தவறு செய்பவர்கள் அந்த வளையத்திற்குள் எப்படி சிக்குகிறார்கள் என்பதை அடுக்கடுக்காக கூறி, அதில் சிக்கிக் கொள்ளாமல் இருக்கும் வழிகளையும் இரண்டாவது கட்டுரையில் விளக்குகிறார்.

வகுப்பில் கணக்குகளைத் தவறாகப்போட்டால், மார்க்குதான் குறையும். ஆனால், வாழ்க்கை கணக்குகளைத் தவறாகச் செய்தால் என்னென்ன கஷ்டங்கள் ஏற்படும் என்பதை ‘வாழ்க்கை எனும் வாத்தியார்’ என்ற கட்டுரையில் குறிப்பிடுகிறார்.

இப்படி வாசகர்களுக்குப் பயன்தரக்கூடிய 49 கட்டுரைகள் இந்நூலில் தொகுக்கப்பட்டுள்ளன.

-பரக்கத்.

நன்றி: துக்ளக், 24/8/2016.