ஐ. சண்முகநாதனின் உலக வரலாற்றுக் களஞ்சியம்

உலக வரலாற்றுக் களஞ்சியம், ஐ. சண்முகநாதன், விகடன் பிரசுரம், 757, அண்ணாசாலை, சென்னை 2, பக்கங்கள் 527, விலை 265ரூ. To buy this Tamil book online – www.nhm.in/shop/100-00-0000-807-9.html

இந்நூலாசிரியர் 42 ஆண்டு காலம் தினத்தந்தியில் உதவி ஆசிரியராகப் பணியாற்றி ஓய்வு பெற்றவர். நாதன் என்ற புனைப்பெயரில் இவர் எழுதிய படைப்புகள் பிரபலமானவை, நூற்றுக் கணக்கான நூல்களைத் தேடி படிப்பதன் மூலம் அறியக்கூடிய பல தகவல்களை, இந்த ஒரு நூலில் அறிந்து கொள்ளும் வகையில் இதை உருவாக்கியுள்ளார் ஆசிரியர். உலகம் எவ்வாறு தோன்றியது என்பதில் தொடங்கி, இன்றைய நவீன காலம் வரை உலகத்தில் நிகழ்ந்துள்ள மிக முக்கிய நிகழ்வுகளை ஆதாரத்துடனும், புள்ளி விவரங்களுடனும், உரிய புகைப்படங்களுடனும் சுருக்கமாக எளிய தமிழில் தொகுத்துள்ளார். மூன்று வகையாகப் பிரிக்கப்பட்டுள்ள நூல் இது. முதல் பாகம் – உலக அளவிலும், இரண்டாவது – இந்திய அளவிலும், மூன்றாவது – தமிழக அளவிலும் தகவல்கள் தனித்தனியாகத் தொகுக்கப்பட்டுள்ளன. மொழி, எழுத்து, நாகரிகம் போன்றவை உருவான விதம், புகழ் பெற்றவர்களின் வரலாறு, உலகை உலுக்கிய நிகழ்வுகள், உலகம் சுற்றிய மாவீரர்கள், புகழ் பெற்ற மன்னர்கள், புரட்சியாளர்கள், ஆட்சியாளர்கள், திரைப்படக் கலைஞர்கள், உலகப் போர்கள்… என்று பல தகவல்கள் உள்ளன. அதேபோல், இந்திய அளவில் இதிகாச காலம் தொடங்கியும், தமிழக அளவில் சங்க காலம் தொடங்கியும் இன்றைய நாகரிக காலம்வரை அனைத்துத் துறைகளிலும் நிகழ்ந்துள்ள நிகழ்வுகள் சிறப்பான முறையில் தொகுக்கப்பட்டு அறிவுக் களஞ்சியமாக இந்நூல் வெளியாகியுள்ளது. -பரக்கத். நன்றி – துக்ளக், 27 பிப்ரவரி 2013.