சச்சின் இதோ நூறாவது செஞ்சுரி

சச்சின் இதோ நூறாவது செஞ்சுரி, வி. கிருஷ்சாணி, தமிழில்-உதயகுமார், கண்ணதாசன் பதிப்பகம், சென்னை 17, பக். 392, விலை 180ரூ. To buy this Tamil book online – www.nhm.in/shop/100-00-0001-013-8.html

விளையாட்டு விமர்சகரும், பத்திரிகையாளருமான வி. கிருஷ்ணசுவாமி எழுதிய புத்தகத்தின் தமிழ்ப் பதிப்புதான் ‘சச்சின் இதோ நூறாவது செஞ்சுரி’. இந்தத் தலைப்பைப் பார்த்ததும் இது சச்சினைப் பற்றியது என்று நினைத்தாலும், புத்தகத்தைப் படித்தபோது சச்சினின் சமகாலத்தில செஸ்ஸில் சாதித்த விஸ்வநாதன் ஆனந்த், டென்னிஸில் சாதித்த லியாண்டர் பயஸ் ஆகியோரின் சாதனைகளைப் பற்றிய தகவல்களும் இதில் இடம்பெற்றுள்ளது. சச்சினின் முதல் சதத்தில் 100வது சதம் வரையும், அதை எட்டுவதற்காக கடந்து வந்த பாதை, சோதனை, அவர் சதமடித்த ஆட்டங்களில் அறிமுகமான வீரர்கள் என எல்லா விஷயங்களும் சொல்லப்பட்டுள்ளன. சச்சினின் பல்வேறு புகைப்படங்கள் புத்தகத்துக்கு அழகு சேர்க்கின்றன. அந்தக் காலக்கட்டத்தில் நடைபெற்ற விளையாட்டு அல்லாத வரலாற்று நிகழ்வுகளும் இந்தப் புத்தகத்தில் இடம்பெற்றுள்ளன. ஆனாலும் சச்சினைப் பற்றிய புதிய விஷயங்கள் எதுவும் இல்லை. நன்றி: தினமணி  

—-

சிதம்பரம், ச. தண்டபாணி தேசிகர், மணிவாசகர் பதிப்பகம், சென்னை 108, பக். 128, விலை 50ரூ. To buy this Tamil book online – www.nhm.in/shop/100-00-0001-013-9.html

மூர்த்தி, தலம், தீர்த்தம், மூன்றாலும் பெருமை பெற்றுத் திகழ்வது தில்லைத் திருக்கோயில். சைவர்களுக்குக் கோயில் என்றாலே சிதம்பரம்தான். தரிசிக்க முக்தி தரும் திருத்தலமான இத்தலத்தின் பெருமை, இத்தலத்தைச் சுற்றியுள்ள கோயில்கள், ஆலய அமைப்புகள், வழிபட்ட அன்பர்கள், புலவர்கள், கல்வெட்டுக்குறிப்புகள், இத்தலம் பற்றிய பக்திப் பனுவல்கள், கர்ண பரம்பரைச் செய்திகள், சேர, சோழ, பாண்டியராகிய மூவேந்தர் மற்றும் நாயக்கர் பற்றிய வரலாற்றுச் செய்திகள் போன்றவை இடம் பெற்றுள்ளன. ஆராய்ச்சிக் குறிப்புகளின்படி கி.மு.6ஆம் நூற்றாண்டு அல்லது கி.பி. முதல் நூற்றாண்டு முதற்கொண்டே தில்லைத் திருக்கோயில் இலக்கிய உலகில் இடம்பெற்றிருப்பதாகத் தெரிகிறது. மிகத் தொன்மையான இக்கோயிலைப் பற்றிய மிகச் சிறந்த ஆராய்ச்சி நூல் இது என்பதில் சந்தேகமே இல்லை. ஆனால் அச்சுப் பிழைகள் மலிந்துள்ளன. உதாரணமாக திருவடி – திருடி என்றும் சேர்க்கும்-சேர்க்கம் என்றும் புவிவிண்டு- புலிலிண்டு என்றும் சிவதீட்சை-சிவதீட்டை என்றும் இவ்வாறு நிறையப் பிழைகள் மலிந்து (பக்கத்துக்கு ஐந்தாறு) காணப்படுகின்றன. இதனால் பாடலின் பொருளே மாறிப்போய்விடுகிறது. படிக்கவே நெருடலாக உள்ளது. அரிய நூலைப் பிழை திருத்துவதில் இனியாவது அதிக கவனம் செலுத்த வேண்டும். நன்றி: தினமணி