ஜெயகாந்தனின் சிறுகதைகள்

ஜெயகாந்தனின் சிறுகதைகள், மீனாட்சி புத்தக நிலையம்.

சிறுகதையில் சாதித்தவர் ஜெயகாந்தன் மறைந்த எழுத்து சிற்பி ஜெயகாந்தனின் சிறுகதைகள் பலவற்றை திரும்பத் திரும்ப படிக்கிறேன். அவற்றில் சிலவற்றை சமீபத்தில் படித்தேன். மீனாட்சி புத்தக நிலையம் அந்த நூல்களை வெளியிட்டுள்ளது. பெண் விடுதலைக்காக, கவிதைகள் மூலம் போராடினார் பாரதி; சிறுகதைகள் மூலம் சாதித்தார் ஜெயகாந்தன். அவரது எழுத்து நடை, காட்சிப்படுத்தும் முறை, சம்பவங்களை சினிமா பார்ப்பது போல காட்டும். சிறுகதையின் ஒவ்வொரு நிகழ்வும் கதையின் பாத்திரங்கள் பரிமாறிக் கொள்ளும் வார்த்தைகளும், மனதில் ஆணி அடித்ததுபோல பதிந்துவிடும். சிறுகதைகள் மூலம், புதிய சமூக துவக்கத்தை கொடுத்தவர் ஜெயகாந்தன். அவரது சிறுகதைகளை தொடர்ந்து, பலர் எழுதினர். ஆனால் சிகரத்தை தொட்டவர் ஜெயகாந்தன் மட்டுமே. கல்லூரியில் படிக்கும் ஏழை பெண்ணின் நிலையை அப்படியே படம் பிடித்து காட்டுவதோடு, அவள் வாழ்வில் நடக்கும் பெரும் சோகத்தையும் வெளிப்படுத்துவது அக்னி பிரவேசம். பேருந்துக்கு நின்று கொண்டிருந்தவளை ஒருவன் அழைத்துச் சென்று சீரழித்துவிடும் சம்பவத்தையும், அதை கண்டு பரிதவிக்கும் தாயையும், பாதிப்பை போக்க செய்யும் பரிகாரத்தையும் மிக அற்புதமாகச் சொல்வார். இதுபோன்ற கதையை ஏன் எழுதினீர்கள் என, அவரைக் கேட்டபோது நீ தாயாக இருந்து பார் என அவர் சொன்ன பதில் இன்றும் காதில் ஒலிக்கிறது. மறுமணத்தை ஆதரிக்கும் யுக சந்தி இன்னொரு புரட்சி. சிறுவயதில் விதவையான பேத்தி, மறுமணம் செய்ய முன்வரும்போது, மகன் அதை கடுமையாக எதிர்க்கிறார். ஆனால் பாட்டியோ மகனை சாந்தப்படுத்தி, மறுமணத்தின் நியாயத்தை சொல்வார். பாட்டியும் விதவையாக இருந்து, தான் பட்ட துன்பங்களை, பேத்தியும் அனுபவிக்க கூடாது என நினைப்பது தலைமுறை அனுபவத்தை பிரதிபலிக்கும். இனிப்பும் கரிப்பும் என்ற சிறுகதை, கூலி தொழிலாளிக்கும், அவனை விட பரம ஏழையாக இருக்கும் பெண்ணுக்கும் நடக்கும் காதலை சொல்கிறது. இதுபோன்ற, அடித்தட்டு மக்களின் வாழ்க்கையை சிறுகதைகள் மூலம் சொன்னவர் ஜெயகாந்தன். அவரது சிறுகதைகள் தந்த ஈர்ப்பு நாவல்களில் கிடைக்கவில்லை. பொன்னீலன், எழுத்தாளர். நன்றி: தினமலர், 12/4/2015.