தமிழும் நானும் (பகுதி 5)

தமிழும் நானும் (பகுதி 5), ஜி. ஜான் சாமுவேல், ஹோம்லாண்ட் பதிப்பகம், பக். 200, விலை 150ரூ.

ஆசியவியல் நிறுவன இயக்குனர் ஜான் சாமுவேல், சமயம், பண்பாடு, மொழி, இலக்கியம் ஆகிய நான்கு ஆய்வுக் களங்களின் வழி, பல மாநாடுகளையும் நூல்களையும் வெளியிட்டவர் ஆசிரியர். ஒப்பீட்டு சமய ஆய்வில் அதிக ஈடுபாடு கொண்டவர். மலேசியிவில் மூன்றாவது முருகன் மாநாடு, தாய்லாந்து பாங்காக் நகரில் மகாசூரி பல்கலைக்கழகத்தில் தேரவாத பவுத்தர் கருத்தரங்கம் ஆகியவற்றில் பங்கேற்ற அனுபவம் சிறப்பாக எழுதப்பட்டுள்ளது. பிறப்பால், வளர்ப்பால், வாழ்வால் நான் கிறித்தவன். ஆனாலும் ஆராய்ச்சியாளமாக நின்று முருக வழிபாடு பற்றி எழுதுகிறேன். மாநாடு நடத்துகிறேன்(பக். 15) என்று மனம் திறந்து ஒப்புக்கொள்கிறார் நூலாசிரியர். ஒரு தனி மனிதனே பெரிய கல்வி நிறுவனமாக நின்று செய்த, தமிழ்ப் பணிகள் பாராட்டத்தக்க வகையில் பதிவாகியுள்ளன. -முனைவர் மா.கி. ரமணன்.  

—-

குறமகள் தழுவிய குமரன், டாக்டர் ம. இராம கிருஷ்ணன், ஞானச்ரமம் அறக்கட்டளை, பக். 75, விலை 50ரூ.

பகழிக்கூத்தர், தன்னுடைய திருச்செந்தூர் முருகன் பிள்ளைத்தமிழில், மொழியும் சமயம் அனைத்திற்கும் முதல்வா என்று முருகனை அழைப்பார். அருணகிரிநாதரின் அனுபவத்தை ஆசிரியர், அம்மகான் பாடிய வார்த்தைகள் கொண்டு, ஆய்வு செய்திருக்கிறார். திருமுருகாற்றுப்படையில், வள்ளியுடன் நகை அமர்ந்து நின்ற முகம் பற்றி, நக்கீரர் பெருமைபடக் கூறியிருக்கிறார். வள்ளி திருமணம், உயிரானது, இறைவனுடன் இரண்டறக்கலத்தல் என்ற அடிப்படையில் அதைச் சான்றாதாரங்களுடன் விளக்குவது சிறப்பு. பொதுவாக அருணகிரியாரின் அநுபூதிச் சிறப்பை பலரும் அறிய முற்படும் காலமாக இது இருக்கிறது. அந்த வகையில் ஆசிரியர், வள்ளியை மணப்புரிந்த பெருமான் செயலை ஆன்மிகப் பார்வையில் அருளாளர்கள் வழி நின்று நிறுவுவது இந்த நூலின் சிறப்பாகும். குமரப் பெருமான் சிறப்பை தினமும் வணங்கும் அருளாளர்கள், இந்த நூலை வரவேற்பர். -பாண்டியன். நன்றி: தினமலர், 29/12/13