தி.க.சி. என்றொரு தோழமை

தி.க.சி. என்றொரு தோழமை, தொகுப்பாசிரியர் கழனியூரன், காவ்யா, பக். 274, விலை 250ரூ.

தி.க.சி. என்று எல்லோராலும் அழைக்கப்பட்ட திருநெல்வேலி கணபதியப்பன் சிவசங்கரன் வசியப்படுத்தாத, அவரிடம் வசியப்படுத்தாத, அவரிடம் வசப்படாத இலக்கிய உலக ஆளுமைகள், வெகு குறைவு. எழுதத் தொடங்கும் எல்லார் மீதும் அவர் பாராட்டு மழை பொழிந்தார். அந்தப் பாராட்டு மழையை உரமாக்கிக் கொண்டு இலக்கிய உலகில் வாழ்ந்து செழித்தவர்கள் பலர். அவ்வாறு தி.க.சி.யால் உரம் பெற்ற பலரும், அவர் மறைந்துவிட்டார் என்ற உடன், தாமே முன்வந்து தமது நினைவலைகளை எழுத்தில் வடித்திருக்கின்றனர். அவர்கள் எழுதி 52 கட்டுரைகள் இந்த நூலில் இடம் பெற்றுள்ளன. அனைத்தையும் படித்தால் தி.க.சி.யின் வாழ்க்கையையே படித்த அனுபவம் ஏற்படுகிறது. தி.க.சி.யை அவர் ஒரு சுக்குப் போல என்கிறார் மூத்த எழுத்தாளர் கி.ராஜநாராயணன். சுக்கு நாக்குத்தான் காரம். வயிற்றுக்கு இதம் என்கிறார். சில சமயம் சிலர் மீது தி.க.சி. முன் வைத்த கடுமையான விமர்சனங்களை இவ்வாறு கூறுகிறார் போலும். தி.க.சி.யின் உற்ற தோழர்களான கழனியூரன், பொன்.வள்ளிநாயகம் ஆகியோரது நினைவலைகள் அவரது வாழ்வின் ஒவ்வோர் அசைவுகளையும் படம் பிடித்துக் காட்டுவதாக உள்ளன. தி.க.சி. மறைந்துவிட்டாலும் இலக்கிய உலகின் இதய அறைகளில் என்றென்றும் வாழ்வார் என்பதற்கு இந்நூல் ஓர் எடுத்துக்காட்டு. நன்றி: தினமணி, 20/4/2015.