உலகக் காப்பியங்கள்

உலகக் காப்பியங்கள், நியூ செஞ்சுரி புக் ஹவுஸ், சென்னை, விலை 360ரூ.

பழங்கால இலக்கிய வகையில் காப்பியம் தனிச் சிறப்பு பெற்றது. இவை அக்கால மக்களின் நாகரிக, பண்பாட்டுக் கருவூலமாக இன்றும் கருதப்பட்டு வருகின்றன. கற்பனை வளமும், இலக்கிய நயமும், சுவை உணர்வும், சிந்தனைத் திறனும் கொண்ட உன்னதப் படைப்பே காப்பியங்களாகும். இத்தகைய சிறப்பு மிகுந்த உலகக் காப்பியங்களை இந்த நூலில் எழுத்தாளர் இரா. காசிராசன் தொகுத்து வழங்கியுள்ளார். இந்த நூலில் முதல் மூன்று தலைப்புகளில் காப்பியத்தின் தன்மை, தோற்றம், வளர்ச்சி, வகை முதலானவை இடம் பெறுகின்றன. இதர பகுதிகளில் உலகக் காப்பியங்களின் தொகுப்புரையும், சில உலகச் சிறப்பு பெற்ற காப்பியங்களின் கதைப்பகுதியும் விரிவாக விளக்கப்பட்டுள்ளது. தமிழ்க் காப்பியங்களோடு ஒப்பிட்டு நோக்கத்தக்க பல செய்திகள், பல உலகக் காப்பியங்களில் காணப்படுவதை ஆசிரியர் ஆதாரத்துடன் கூறுகிறார். பாராட்டுக்குரிய அரிய முயற்சி. நன்றி: தினத்தந்தி, 4/2/2015.  

—-

மணிமேகலை புதிய நடையில், கவிஞர் த.பாரி, தமிழ் உதயா பதிப்பகம், குடியாத்தம், விலை 50ரூ.

ஐம்பெரும் காப்பியங்களில் ஒன்றான மணிமேகலை துறவு நிலை, பசிப்பிணையைப் போக்குதல் ஆகியவற்றை வலியுறுத்தும் காப்பியம். சிலப்பதிகாரத்தின் துணைக் காப்பியமாக இதை புலவர்கள் போற்றிப் பாராட்டுவர். ஆசிரியப்பா யாப்பில் காப்பியம் தந்த கூலவாணிகன் சீத்தலைச் சாத்தனார் இயற்றிய இக்காப்பியத்தை, கவிஞர் த. பாரி எளிய நடையில் எல்லோரும் புரிந்துகொள்ளும் விதமாக உரைநடைக் கவிதையில் நூலாக்கித் தந்திருக்கிறார். நன்றி: தினத்தந்தி, 4/2/2015.