கெட்டவார்த்தை பேசுவோம்

கெட்டவார்த்தை பேசுவோம், பெருமாள் முருகன், கலப்பை பதிப்பகம்.

பீப் பாடல் துணிச்சல் வந்தது எப்படி? பெருமாள் முருகன் எழுதி, கலப்பை பதிப்பகம் வெளியிட்ட, கெட்ட வார்த்தை பேசுவோம் என்ற நூலை சமீபத்தில் படித்தேன். ப.மணி என்ற பெயரில் அவர் எழுதி, உள்ளூர் சிற்றிதழில் வந்த கட்டுரைகளின் தொகுப்பு இந்த நூல். மனிதன் முதல் கால்நடை வரை பாலியல் புணர்ச்சி மற்றும் கிராமப்புற சொல்லாடல்களைப் பற்றியது இந்த நூல். கிராமங்களில் சாதாரணமாக பேசும் கெட்டவார்த்தைகளைக் கேட்டு யாரும் முகம் சுளிப்பதில்லை. அதனால் அந்த வார்த்தைகளை பேசுவதில் தவறில்லை என்பதாக, நூல் செல்கிறது. சங்க இலக்கியங்கள், பக்தி பாடல்களில் இருக்கும் பாலியல் சொல்லாடல்களை குறிப்பிட்டு, அதன் விளக்கங்களையும் நூலாசிரியர் குறிப்பிடுகிறார். கம்பரின் ‘தனிப்பாடல் திரட்டு’ என்ற நூலில், கம்பர் கையாண்டுள்ள சொல்லாடல்கள் பற்றியும் கூறுகிறார். நூலாசிரியரைப் பொறுத்தவரை, நம் இலக்கியங்கள், ஆலயங்களில் வடித்துள்ள சிற்பங்கள் பலவற்றில், பாலியலைக் குறிப்பிடும் அம்சங்கள் இருக்கலாம். அதற்கான ஆதாரங்களும் இருக்கலாம். அதை யாரும் மறுக்கவில்லை. அவற்றை எல்லாம் அப்படியே, இந்த இளைய சமூகத்துக்கு எடுத்துச் செல்ல வேண்டுமா என்பதே கேள்வி. இன்றைய தொலைத்தொடர்பு வளர்ச்சியில், இணைய வசதி இருந்தால், சிறு குழந்தைக்குகூட, அது கேட்காமலேயே, பாலியல் விவரங்கள் வந்து விழுகின்றன. மரபு சார்ந்த அம்சங்களை மக்களுக்கு கொண்டு செல்கிறேன் என்ற நோக்கில், இதுபோன்ற நூல்கள் இருக்கும் துணிச்சலால், இன்று பெரும் சர்ச்சையை ஏற்படுத்தி உள்ள, ‘பீப் பாடல்’ வந்துள்ளது. நாகரிக சமூகத்தில், எதை எப்படிச் சொல்ல வேண்டும் என்ற வரையறைக்குள் எழுத்தாளர்களும், கவிஞர்களும் இருப்பது, சமூகத்துக்கு நல்லது. உண்மையை சொல்கிறேன் என கூறிக்கொண்டு, வக்கிர பாலியல் சிந்தனைகளை ஊட்டுவது முறையற்றது. என் சிந்தனையை பாடுவேன், பேசுவேன் என்றால், பிறருக்கு தொல்லை தராமல், தனியாக மலை மீது நின்றுகொண்டு, பாடவோ, கத்தவோ செய்யலாம். ஏன் இப்படி செய்தாய் என, யாரும் கேட்கப் போவதில்லை. -சூர்யநிலா. கவிஞர். நன்றி: தினமலர், 20/12/2015.