முக்கிய விண்ணப்பப் படிவங்கள்

முக்கிய விண்ணப்பப் படிவங்கள், வடகரை செல்வராஜ், ரேவதி பப்ளிகேஷன்ஸ், புதிய எண் 76, பாரதீஸ்வரர் காலனி, 2வது தெரு, கோடம்பாக்கம், சென்னை 24, விலை 350ரூ.

எந்தவொரு தேவைக்கும் அரசை அணுகும்போது, அதற்குரிய விண்ணப்பத்துடன் அணுக வேண்டும். அந்த விண்ணப்பப்படிவங்கள் முறையாக இல்லையென்றாலோ, சரியாகப் பூர்த்தி செய்யவில்லை என்றாலோ, அவை நிராகரிக்கப்பட்டுவிடும். இவ்விஷயத்தில் படித்துப்பட்டம் பெற்றவர்களே திணறும் நிலை உள்ளது. இவற்றை கருத்தில் கொண்டு, இப்பிரச்னையை எளிதாக்கும் வகையில், அரசுத் துறைகளில் பொதுமக்கள் பயன்படுத்தும் முக்கிய விண்ணப்பங்களைத் தொகுத்து நூலாக வெளியிட்டுள்ளார் இந்நூலாசிரியர். பொதுவாக, விண்ணப்பப் படிவங்கள் எல்லாம் ஏ4 சைஸ் வடிவத்தில்தான் இருக்கும். எனவே, இந்தப் புத்தகமும், தேவைப்படும் விண்ணப்பப் படிவத்தை ஜெராக்ஸ் எடுக்கும் வகையில் ஏ4 சைஸ்ல் தயாரிக்கப்பட்டுள்ளது. இந்நூலில் வருவாய்த் துறை, மின்சாரத் துறை, பதிவுத் துறை, சமூக நலத்துறை, பிறப்பு/இறப்புச் சான்றிதழ், குடும்ப அட்டை, ஆர்.டி.ஓ. விண்ணப்பப் படிவங்கள் என்று பொதுமக்களுக்குத் தேவையான நூற்றுக்கும் மேற்பட்ட விண்ணப்பப் படிவங்களும், அதனுடன் இணைத்து அனுப்ப வேண்டிய மற்ற விபரங்களும் அதற்குரிய பகுதிகளில் விளக்கப்பட்டுள்ளன. இவை மனுதாரர்களுக்கு மிக எளிதான, சிறந்த வழிகாட்டியாகவும உள்ளன. அனைத்து வீடுகளிலும்  இருக்க வேண்டிய உபயோகமான நூல் இது. -பரக்கத். நன்றி: துக்ளக், 12/2/2014.  

—-

சிறகுகளை விரி சிகரங்களைத் தொடு, புஷ்பம் அமல்ராஜ், சபரீஷ் பாதி, 8, மாசிலாமணி தெரு, அரவிந்த் நரேன் என்கிளேவ், பாண்டிபஜார், தி.நகர், சென்னை 17, விலை 80ரூ.

பாட்டி தன் பேத்திக்கு கடிதம் மூலமாக கல்வி அறிவு, குடும்பம் மற்றும் சமூக அறிவுரைகளை சொல்வது போல நூல் படைக்கப்பட்டுள்ளது. இளைஞர்களுக்கான ஊக்குவிப்பு, நல்லொழுக்க கருத்துகள் இடம்பெற்றுள்ளன. நன்றி:தினத்தந்தி, 10/7/2013.