திருமணக் கோவில்கள், தாமரை பிரதர்ஸ் மீடியா, பக். 144, விலை 150ரூ. திருமண தடை நீங்க, கோவிலுக்கு செல்லும் பக்தர்கள் ஏராளம். அவர்களுக்காக, திருமணம் தொடர்பான பிரச்னை நீங்க, வழிபட வேண்டிய சுவாமிகள் பற்றிய கட்டுரை தொகுப்பு. ஆன்மிகமும், சுவாரசிய தகவல்களும் நிரம்பிய புத்தகம் இது. நன்றி: தினமலர், 22/1/2018.

பாவேந்தர் பாரதிதாசனின் பாண்டியன் பரிசு, முனைவர் சபா. அருணாசலம், முல்லை பதிப்பகம், விலை 40ரூ. புரட்சிக் கவிஞர் படைத்த வீரம், காதல், நகைச்சுவை என யாவும் நிறைந்த ஒப்பற்ற காவியமான பாண்டியன் பரிசின் சுருக்கம், முழுமையாகப் படித்த உணர்வைத் தரும் வகையில் செதுக்கித் தந்திருப்பது பாராட்டத்தக்கது. நன்றி: குமுதம், 21/3/2018.

மனைவிக்கு, பெருங்கவிக்கோ, கவியரசன் பதிப்பகம், விலை 190ரூ. பெருங்கவிக்கோ வா.மு.சேதுராமன், தமது இல்லத்தரசிக்கு எழுதிய கடிதங்களின் தொகுப்பு. தனிப்பட்ட இருவருக்குமான தகவல்களாக இல்லாமல், மனம் ஒருமித்த தம்பதியராக இல்லறத்தை நல்லறமாய் நடத்திட விரும்பும் எல்லோருக்குமே வழிகாட்டும் வகையிலான மடல்களாக இருப்பது சிறப்பு!. நன்றி: குமுதம், 21/3/2018.

சோழர் வரலாறு, சி.கோவிந்தராசனார், சி.கோ.தெய்வநாயகம், அன்னம், பக். 222, விலை 150ரூ. சங்க கால சோழர் முதல், பிற்கால சோழர் வரை இந்நூல், சுருங்க விளக்கியுள்ளது, ஆய்வுக்குரிய அடிப்படை செய்திகளை இதில் காணலாம். நன்றி: தினமலர், 22/1/2018.

நான் அவள் கேபுச்சினோ, ஹரிஷ் குணசேகரன், பாரதி பதிப்பகம், பக். 144, விலை 120ரூ. தகவல் தொழில்நுட்ப அரங்கில் பணிபுரியும், இளைய தலைமுறையினரின் விதிக்கப்பட்ட தினசரி வாழ்க்கை. வயதின், சூழலின் நெருக்கத்தில் வரும் காதல்கள், பிரிவின் துயரங்கள், இந்தக் கதையில் விரவிக்கிடக்கின்றன. நவீன கால வாழ்க்கையைப் பேசும் இலக்கியம், அமுத கண்ணும், சிந்திய மூககுமாய் இருக்க வேண்டும் என்பதை, இந்நாவல் மறுத்து ஒதுக்குகிறது. நன்றி: தினமலர், 22/1/2018.

பிணா, பத்மஜா நாராயணன், விருட்சம், பக். 71 விலை 50ரூ. ஆசிரியரின் கவிதைகளில் கடல், அலை, நதி, காற்று, நரம்புகள் ஊடாக பறக்கும் பறவை, பச்சை கிளிகள் என, புற உலகம் காட்சிப்படுத்தப்படுகின்றன. ஒரு பெண் தனிமையில் வாடுகிறாள், தன்னை நெருங்கியவரின் பிரிவால் தடுமாறுகிறார் என்பதை கவிதையில் கொண்டு வந்துள்ளார். நன்றி: தினமலர், 22/1/2018.

நவீன யுகம், அஜயன் பாலா, நாதன் பதிப்பகம், பக். 328, விலை 300ரூ. சினிமாவின் நவீன யுகமாக கலை சினிமாவுக்கும், வணிக சினிமாவுக்கும் இடைப்பட்ட கோடு அழியத் துவங்கிய காலம் துவங்கியது. உலக சினிமா வரலாற்றின் முந்தைய இரண்டு பாகங்களின் தொடர்ச்சியாக வெளிவந்துள்ள இந்தப்புத்தகம் தொழில்நுட்ப வளர்ச்சி, காட்சிப்படுத்தல் உத்திகள் என, நவீன யுக உலக சினிமாக்களை ரசனையோடு விவரிக்கிறது. நன்றி: தினமலர், 22/1/2018.

மகளதிகாரம், ஆண்டன்பெனி, தமிழ் அலை பதிப்பகம், பக். 104, விலை 90ரூ. ஒரு மகளின் ஆளுமையிலும், அதிகாரத்திலும் உணர்ந்ததை, கவிதையாக மொழிபெயர்த்திருக்கிறார் ஆசிரியர். மகன், ஒரு தகப்பனின் வாழ்வை அர்த்தமுள்ளதாக்குகிறான் என்றால், மகளோ, ஒரு தகப்பனின் வாழ்வையே முழுமையாக்குகிறாள் என்பதாக, இந்நூல் அமைந்து உள்ளது. நன்றி: தினமலர், 22/1/2018.

கிறுக்கு ராஜாக்களின் கதை, முகில், விகடன் பிரசுரம், பக். 264, விலை 190ரூ. மண்ணில், ஆட்சி செய்த, ஆட்சிக்காக அட்டூழியம் செய்த கொடூரர்களின் வரலாறு. வார இதழில் தொடராக வந்த கட்டுரைகள், இப்போது நூல் வடிவமெடுத்திருக்கின்றன. சிலரின் வரலாற்றை அறியும்போது, வாசகர்கள் அதிர்ச்சி அடைவர் என்பது உறுதி. நன்றி: தினமலர், 17/1/2018.